मतदार यादीत नाव तपासा, त्रुटी असल्यास मुदतीत दुरुस्ती करा – श्रावण पाटील भिलवंडे
३० सप्टेंबरपर्यंत दावे-हरकती दाखल करता येणार; नावासाठी फॉर्म ६, वगळण्यासाठी फॉर्म ७ तर दुरुस्तीसाठी फॉर्म ८
नायगाव प्रतिनिधी – गोविंद नरसीकर
नायगाव विधानसभा मतदारसंघाची प्रारूप मतदार यादी ३१ ऑगस्ट २०२६ रोजी प्रसिद्ध करण्यात आली आहे. संबंधित मतदान केंद्रांवर तसेच मतदार नोंदणी उपविभागीय अधिकारी यांच्या कार्यालयात ही यादी नागरिकांच्या पाहणीसाठी उपलब्ध करून देण्यात आली आहे. मतदारांनी प्रारूप यादीत आपले नाव आहे की नाही, तसेच नाव, पत्ता आणि इतर तपशील अचूक आहेत की नाही, याची खात्री करून घ्यावी, असे आवाहन भाजपचे नेते तथा नायगाव पंचायत समितीचे माजी सभापती श्रावण पाटील भिलवंडे यांनी केले आहे.
भारत निवडणूक आयोगाच्या निर्देशानुसार प्रसिद्ध करण्यात आलेल्या या प्रारूप मतदार यादीच्या माध्यमातून मतदारांना आपल्या नोंदीची पडताळणी करण्याची संधी उपलब्ध झाली आहे. यादीत नाव समाविष्ट नसल्यास नवीन मतदार म्हणून नाव नोंदविण्यासाठी दावा करता येणार आहे. तसेच एखाद्या मतदाराच्या नावाच्या समावेशास आक्षेप असल्यास किंवा मतदार यादीतील नाव, पत्ता अथवा अन्य तपशिलात काही त्रुटी असल्यास संबंधित नागरिकांना विहित नमुन्यात दावा अथवा हरकत दाखल करता येणार आहे.
३० सप्टेंबरपर्यंत दावे-हरकती
प्रारूप मतदार यादीसंदर्भातील दावे व हरकती दाखल करण्यासाठी ३० सप्टेंबर २०२६ ही अंतिम मुदत आहे. त्यामुळे मतदारांनी मुदत संपण्यापूर्वी आवश्यक ती कार्यवाही करावी, असे आवाहन करण्यात आले आहे. यादीत नाव नसलेल्या पात्र नागरिकांनी नाव नोंदणीसाठी, तर विद्यमान नोंदीत बदल किंवा दुरुस्ती आवश्यक असल्यास त्यानुसार अर्ज करणे अपेक्षित आहे.
फॉर्मनुसार करता येणार कार्यवाही
मतदार यादीत नवीन नाव समाविष्ट करण्यासाठी फॉर्म क्रमांक ६, एखादे नाव वगळण्यासाठी अथवा त्यावर आक्षेप नोंदविण्यासाठी फॉर्म क्रमांक ७, तर नाव, पत्ता किंवा अन्य तपशिलातील दुरुस्तीसाठी फॉर्म क्रमांक ८ वापरता येणार आहे.
याशिवाय, १ ऑक्टोबर २०२६ रोजी वयाची १८ वर्षे पूर्ण करणारे पात्र नागरिक मतदार यादीत नाव समाविष्ट करण्यासाठी फॉर्म क्रमांक ६ द्वारे दावा दाखल करू शकतात. त्यामुळे प्रथमच मतदानाचा अधिकार मिळणाऱ्या युवक-युवतींनीही या संधीचा लाभ घ्यावा, असे भिलवंडे यांनी म्हटले आहे.
बीएलओंकडेही दाखल करता येणार अर्ज
दावे व हरकती संबंधित सहाय्यक मतदार नोंदणी अधिकारी यांच्या कार्यालयात किंवा संबंधित मतदान केंद्रस्तरीय अधिकारी (बीएलओ) यांच्याकडे दाखल करता येणार आहेत. संबंधित तालुक्यांमध्ये सहाय्यक मतदार नोंदणी अधिकारी नियुक्त करण्यात आले असून, मतदार यादीतील भागनिहाय दावे व हरकतींची पुढील कार्यवाही केली जाणार आहे.
लोकशाही प्रक्रियेत मतदार यादीतील अचूक नोंद अत्यंत महत्त्वाची असल्याने नागरिकांनी केवळ निवडणुकीच्या वेळीच नव्हे, तर प्रारूप यादी प्रसिद्ध झाल्यानंतरच आपल्या नावाची पडताळणी करणे आवश्यक आहे. नाव नसणे, चुकीचा पत्ता किंवा अन्य तपशीलातील त्रुटी निदर्शनास आल्यास विहित मुदतीत दावा अथवा हरकत दाखल करून नोंद दुरुस्त करून घ्यावी, असे आवाहन श्रावण पाटील भिलवंडे यांनी केले आहे.
